Amo 3 | MEU | STEP | Israel taumui e, ina hereva, Iehova ese umui latamui ai, Aigupto tanona amo na hakaua lasi besena idoinai latanai, vada e gwauraia herevana vada ba kamonai.

Amos 3

Peroveta tauna ena ḡaukara

1 Israel taumui e, ina hereva, Iehova ese umui latamui ai, Aigupto tanona amo na hakaua lasi besena idoinai latanai, vada e gwauraia herevana vada ba kamonai.

2 Tanobada besedia iboudiai bogaragidia amo
umui sibomui vada na dibamui;
taunabunai lau ese matamui baina hakani,
emui kara havara iboudiai daidiai.

3 Tatau rarua basiema henega bou guna,
idia bema raka hebou diba a?
4 Leona na asi damuna negana ai
uda ai e ḡoumu a?
Leona natuna ese ḡau ta se abiamu negana ai
ena kohua lalonai e taimu a?
5 Idoa se miamu gabuna ai
manu ta e heidoamu a?
Ḡau ta se heidoa negana ai
idoa na e hepiu isimu a?
6 Kibi na hanua ta ai e hiririamu negana ai
taunimanima basie gari a?
Iehova ese se hadikaiamu negana ai
dika na hanua ta ai e kaumu a?
7 Momokani Ḡaubada Iehova ese kara ta se karaia hehunimu,
a peroveta taudia, ena hesiai taudia, na e hadibalaidia gunamu.
8 Leona vada e ḡou,
daika basine gari?
Ḡaubada Iehova vada e hereva;
daika basine peroveta?

Samaria irevana

9 Asuria ena gabu aukadia ba hamaorodia,
bona Aigupto tanona ena gabu aukadia danu;
baoto: Samaria ororodia latadiai ba hahebou,
heloḡo-ahuahu badadia ia lalonai ba itadia,
bona hahehisi karadia ia bogaraginai danu.
10 Iehova na e tomu: Kara maoromaoro ikaradia na asi dibadia;
idia ese daḡedaḡe bona dadidadi karadia na
edia gabu aukadia ai e heḡaeḡaelaidiamu.
11 Taunabunai Ḡaubada Iehova ini e gwau tomamu;
mai tauna ta ese tano baine koua hegege,
emui maḡu baine ḡiḡidia dobi,
bona emui gabu aukadia kohudia baine dadi ore.
12 Iehova ini e gwau tomamu: Mamoe ireḡudia tauna ese leona uduna amo mamoe aena rua eiava taiana kahana baine rauadia na heto, Israel taudia Samaria ai e nohomu na unu bae rauadia toma, mai hekure patana daigunina ta eiava mahuta ḡauna kahana ta ida.

13 Ḡaubada Iehova, Iehova Sabaota, ini e gwau tomamu:
A kamonai, bona Iakob iduhuna latanai
hahebade herevadia ba gwaurai, baoto,
14 Israel na ena kara havara daidiai matana baina hakania dinana ai,
lau ese Betele ena ihaboulaina patadia latadiai
mata-hakani karadia baina kara;
bena ihaboulaina patana doadia bae heutu oho,
tano ai bae moru.
15 Keru negana rumana bona siahu negana rumana na baina huaridia,
bona aivori ^{▼▼“Aivori” na elefant doadia.} rumadia na bae heḡiḡi dobi,
bona ruma badadia na bae ore vaitani.
Iehova na e herevamu.